اهتزّت بعض الأصوات لطلب الاعتراف باللغة الأم أو اللغة الأصلية ديال كلّ الشعوب فالعالم، ؤ واخّا الناس اللي كا يهذروها قلال، ؤ هذ الشي فكلّ وقت ؤ خاصّةً فمُجتمعات اللي اللغة الأم كا  تعيش فيها تحت سلطة لغة رسمية أو استعِمارية. فهذ السياق نلقاوا أمثال قريبة من المغرب.
فبلادنا انتونيو دي نيبريخة كتب فعام ألف ؤ أربع مائة ؤ ثنين ؤ تسعين نحو اللغة القشتالية فزمان فاللي الدراسة فالجامعة كانت باللغة اللاتينية. خمسة ؤ عشرين سنة من بعد، ألّف نفس الكاتب دراسة على "ضبط كتابتها". نيبريخة كان رائد فأوربّا ؤ تبعوه دارسين من لغات أخرى فالقارّة القديمة. فمالطة، اللغة المالطية، ؤ هيَّ من عائلة العربية، ولّات لغة رسمية فعام ألف ؤ تسع مائة ؤ أربعة ؤ ثلاثين. من قبل، اللغات الرسمية كانتْ غير الطاليانية ؤ الينگليزية. هذ الصفة الرسمية فهذ الدولة من الاتّحاد الأوربّي جات بعد ما تكوّنتْ لجنة من كتّاب مالطيّن فعام ألف ؤ تسع مائة ؤ عشرين باش يناقشوا ترميز ؤ تطبيع كتابة اللغة المالطية. ؤ الحالة الثالثة، ؤ هيَّ قريبة من اليوم على الزوج ديال الحالات اللي تكلّمنا عليهم قبل، هيَّ اللغة اليوناية. الكاتب ؤ عالم الاقتصاد فؤاد العروي كا يقارن ازدواجية العربية مع الحالة اللغوية فاليونان قبل عام ألف ؤ تسع مائة ؤ ستّة ؤ سبعين. قبل هذ السنة، الحكومة كانت كا تستعمل "الكاثاريفوسة"، لغة فمستوى قديم، مقابلة "الذيموطيكي"، اللغة الأم ديال اليونانيّن. ؤ فهذ الوقت جا قانون جديد اللي دار "الذيموطيكي" لغة رسمية ديال البلاد .
فهذ الثلاثة ديال الحالات، المساعدة ؤ التدخُّل ديال الحكومة كانوا زوج عوامِل مهمّين لتطبيع كتابة اللغة الأم ؤ تعميم دِراستها في المدارس ؤ الجامعات ؤ المراكز التعليمية بصفة عامّة. المثال الشعبي  فالمغرب كا يقول: "يدّ وحدة ما تصفّق شي". إذًا، حضور الباحثين بوحدهم ماشي كافي ؤ خصّنا يدّ الدولة باش نبنيوا واحد السياسة اللغوية كيف داروا فاسبانيا، فمالطة ؤ فاليونان.
العالم اللغوي الاسباني لاثارو كارّيطير كا يذكّرنا باللي الأفكار الاوّليّن على أصل اللغة تّقالوا فالقرن الخامس قبل ميلاد المسيح ؤ هكذا خلقوا زوج نظريّات اللي بقاوا حتّى اليوم ؤ هم "الأصل الإلهي" اللي كان كا يدافع عليه هيراقليطس ؤ "الأصل المتّفق عليه" اللي كان كا يدافع عليه ديموقريطس حيث الإنسان محتاج بالاتّصال. هذ الزوج ديال النظريّات كانوا مشهورين مع مرور الزمان بفضل إفلاطون ؤ أرسطو. فالماضي ؤ فالحاضر بعض اللغات سيطروا على غيرهم ؤ ولّوا بحال جهاز باش يقهر لغات أخرى اللي ما كانتْ ش محتمية بسلطات سياسية ؤ لا دينية. القشتالية سيطرَت على العربية ؤ باقي اللغات ديال اسبانيا ؤ العربية اللي كتبوا بيها القرآن سيطرت على خواتاتها العربية ؤ اللغات الأخرى اللي كانت تّهذرت فالآراضي المفتوحة، بحال الأمازيغية فشمال إفريقيا.
فرانيسكو موسكوسو غارثية: "العربية المغربية، اللغة الأم أو اللغة الأصلية. تعليمها فالمدرسة لتحسين تطوّر العقليّات ؤ مهارات الهذرة ؤ القراية ؤ الكتابة بالعربية الفصحى". al-Andalus-Magreb 20 (2013) [in press]